Meizial ka zuk hmasak ber tum chu 1993 vel kha ni ta in ka hria, ka cousin in a zuk lai min fawh tir ve zuai a, pa ka in ti ve lutuk . Khatih lai khan pawl riat ka zir mek a mahse high school leh college ka kal lai kha chuan zu lo ang tluk ka ni in ka hria. High school kal lai chhung zawng kha chuan a belhkahwmin bawm hnih vel ka zuk ka ring.
College kal lai khan kar khatah tlawn 10 vel hi ka zu ve chauh maithei. 2003 khan hna ka thawk ve tan a , pawisa te kan lo hlawh chhuah ve vang te pawh niang ka zu hnem ta angrem khawp mai a. Rilru hah vang em em pawh a ni lo, thian ten an zuk vanga zu ve pawh ka ni chuang lo meizial zuk hi a nuam ka lo ti ve hrim hrim ti ila a dik ber awm e.
Hun rei lo te chhung khan nikhata tlawn 2 vel zu thin kha tlawn 10 ah ka kai chho ta thut ta a. 2007 thleng a ka zuk ber thin Wills Navy Cut kha 1995 a ka pocket money a ka lei hmasak ber khan bawm khat (10 awmna) hi cheng 12 ni ta in ka hria. Taksa pawn a tuar tan ta reng bawk a – chawlh hmanga Aizawl a ka haw chang te hian step a kal te kha ka harsat a thawk te hi a hah hma thei thin khawp mai. 2007 khan Wills Classic Milds ka zu tan ta a, packet khat (20s pack) hi Cheng 94 an chhiar a thla khatah hian cigarette man ringawtah cheng 2800 vel ka seng ang .
Ka sum hmanral atang ringawt pawh hian meizuk bansan tumna rilru lian tak chu nei tawh tur chu ka nia mahse bansan tawp hi a lo har em ani. Chawi ei kham te hian zuk hi a nuam em a , a bikin vawksa hmeh zawh a chaw ei khama kuhva hring thial suah suah pah a han zuk heuh heuh hi chu a van han nuam tak em.
Tihtur neih loh chang a in a awm mai mai TV/Movie en lai te hian meizial hi ka ban reng bawk. Vawi 3 vel chu bansan ka tum tawh a. A aiah sweet/bubblegum te ei kan tum a mahse a daih rei tak tak lo. Sap hovina “cold turkey” method an tih mai anga quit hi chu a lo har ngang mai. (Cold turkey quit chu vawilehkhata thil tih thin tih tawp thut) .
Nicotine patch hi hmang ve chhin ila a tha angem te ka tia mahse vawikhat chu Bangalore a medical dawr lian ve deuh ah hian Nicotine patch an neih leh neih loh ka zawt , a zuartupa pakhatin kan nei lo , chu chu enge , condom ami te ti mai mai sia ka buaipui zui ta em em rih lo.
Tichuan 2010 kumthar ni atang vel khan engtin tin mawni ka nghei ve tan a mahse nghei han tih ah Monday to Friday hi ka zu lova mahse weekend hi chuan ka insum zo ngang lova ka zu leh ta nge nge thin. Tiang khan thla thum erh awrh chu ka ti chhova mahse hun a lo kal zela thil hrang hrang vangten rilru hah chang a lo awm khan weekday zuk loh te kha ka thei ta ngang lova a ngai te in regular tak chuan hei ka lo zu leh chu a ni ta mai sia!
Kum lamah te pawh kan lo upa ve deuh tawh a (han ti ve ringawt ila) nupui te pawh kan la nei duh anga, fa te pawh kan la nei duh ngei dawn sia meizial kan zuk reng chuan fa neih lamah te pawh buaina a thlen thei dawn tih hria in tunlai tak hian bansan duhna rilru lian tak ka pu ve tan tawh. Thian te pawh hian i zu hnem e min ti fova a zahthlak lamah a kal tawh chuvangchuan theihtawp chhuahin nghei kan tum ve tawh ange!
